Заедно oдлучуваме!

Организирање инклузивен тим за донесување одлуки:

• Тимот ученици кои ја организираат активноста се грижи просторот за работилницата да биде достапен за сите ученици и приспособен според потребите на учениците со физичка попреченост.
• Тимот ги охрабрува сите ученици – со или без попреченост – да се пријават за да учествуваат во работилницата.

Подготовка на теми и прашања за дискусија:

• Подгответе неколку теми или прашања поврзани со училишните активности, како на пример: „Какви училишни активности би сакале да имаме оваа година?“ или „Како можеме да го направиме училиштето поинклузивно?“
• Секој учесник има можност да додаде теми кои смета дека се важни за дискусија.

Започнување на активноста:

• Организацискиот тим започнува со кратко објаснување за целта на активноста – да се слушнат сите мислења и да се вклучат сите во донесување одлуки.
• Тимот ги поттикнува учениците да го споделат своето искуство и да предложат идеи за подобрување на училишниот живот.
• Учениците се поделени во мали групи, во кои секој член може да ги сподели своите идеи и да одговори на поставените прашања.

Групно генерирање идеи:

• Во секоја група, учениците ги дискутираат темите и ги запишуваат своите идеи на голема табла или постер. Секоја група има „говорник“ кој ќе ги претстави идеите пред сите.
• Оваа дискусија им овозможува на сите ученици – особено оние со попреченост – да се изразат и да ја споделат својата перспектива.

Презентирање на идеите и гласање:

• По завршувањето на дискусијата, секоја група го претставува своето резиме пред сите учесници. Организацискиот тим поставува табла каде што се наведени сите предложени идеи.
• Учениците добиваат самолепливи ливчиња или картички за гласање, со кои можат да гласаат за идеите што им се допаѓаат најмногу. Идеите со најмногу гласови се сметаат за приоритетни и ќе бидат дел од финалниот план за училишните активности.

Создавање план за акција:

• Организацискиот тим заедно со учесниците ги избира најдобрите идеи и создава конкретен план за нивно спроведување. Секој учесник е поканет да биде дел од имплементацијата на активностите кои биле избрани.
• Учениците со попреченост се дел од тимот, што дополнително ќе ја поттикне нивната мотивација и самодоверба.

Дополнителни активности:

• Организацискиот тим може да изработи постер со сите идеи и да го постави на видно место во училиштето, како потсетник за поддршката и инклузијата што е создадена преку оваа активност.