Различни но заедно

Подготовка на етикети во вид на налепници.

• Се сечат налепници според планираниот број на учесници во активноста. 
• Планирање соодветна содржина на налепниците и прашања за дискусија. 
• Пишување на налепниците со маркер.  Како пример за позитивни налепници: Насмевни ми се!; Ракувај се со мене!; Кажи ми „здраво“!; и сл. Како пример за негативни налепници: Игнорирај ме!; Исплази ми се! и сл. 
• Се испишуваат поголем број налепници. 

Одредување ученик кој ќе биде модератор на активноста.

Ученикот – модератор ги поздравува учесниците и објаснува дека ќе играат една игра, но пред да започнат, го поставува прашањето:

• Дали мислите дека понекогаш ги етикетираме луѓето затоа што се разликуваат од нас? Зошто го правиме тоа? 

Ученикот – модератор ги лепи налепниците на челото на учениците, при што посочува дека е многу важно учениците да не си ги гледаат своите налепници ниту пак да им кажуваат на останатите што пишува на нивната налепница. 

Ученикот – модератор им кажува на учениците меѓусебно да комуницираат така што кон секој ученик ќе се однесуваат онака како што пишува на налепницата.  

Учениците ја спроведуваат активноста и се враќаат на своите места на знакот на ученикот – модератор. Учениците не ги гледаат сопствените налепници и не им кажуваат на останатите што пишува на нивните налепници. 

Ученикот – модератор започнува дискусија со поставување на прашањата: 

• Како се чувствувавте додека комунициравте?;
• Без да ја гледате вашата налепница, дали претпоставувате што пишува на неа? Како знаете?;
• Ве молиме, нека кренат рака сите кои мислат дека имаат налепница „Игнорирај ме!“ или „Исплази ми се!“. Како се чувствувавте?

Ученикот – модератор им кажува на учениците дека можат да ги извадат и погледнат налепниците и ги поставува следниве прашања:

• Како можеме да го промениме нашето однесување за да се увериме дека никој не се чувствува етикетирано?;
• Што прават луѓето кои се чувствуваат етикетирани и изолирани? Дали тие почнуваат да се дружат само со оние кои се слични на нив? Дали тие се чувствуваат осамено и повредено?;
• Како можеме да бидеме подобри пријатели и да ги вклучиме сите во нашите активности? 

Активноста завршува со запишување предлози што можат да се воведат во групата за поголема интеграција и комуникација (на табла или на хамер).