Со игри до другарство – за училиште без насилство

• Организирање состанок на училишниот тим со менторите.
• Истражување и избор на игри соодветни за возраста (VI – VII одделение).
• Планирање активности, поделба според улоги и задачи (водење, објаснување правила, материјали).
• Одредување локација – излетничко место „Динќут“.
• Подготовка на визуелен материјал (упатства за игри, постери, хамери, реченици).

Собир и вовед

Учениците се собираат во училишниот двор и се делат во мешани групи (ученици од VI и VII одделение).

Членовите на училишниот тим ги поздравуваат сите и накратко ги објаснуваат целите на активноста: градење доверба, другарство и подобро меѓусебно запознавање.

Се прави заедничко пешачење до излетничкото место Динќут.

Игра 1: „Дува, дува ветер“

Цел: Размрдување, внимание и групна динамика

Опис на играта:

• Учениците застануваат во круг. Еден ученик застанува во средина и започнува со реченицата: „Дува, дува ветер, сите кои имаат… [карактеристика] нека се сменат со …“ На пример: „…сите кои имаат долга коса“, „…сите кои носат црвено“, итн.
• Сите ученици што ја исполнуваат условената карактеристика треба да се преместат и да најдат ново место.
• Оној што ќе остане без место, оди во средината и играта продолжува.

Придобивки: Поттикнување физичка активност, брзо размислување и комуникација, подобро забележување на другите.

Игра 2: „Две лаги и една вистина“

Цел: Меѓусебно запознавање и развивање комуникациски вештини

Опис на играта:

• Учениците седнуваат во круг, по можност во мешани групи (од 6 до 7 ученици).
• Секој ученик кажува три тврдења за себе – две лаги и една вистина, без да открие кое е вистинито.
  Пример: „Имам брат.“ „Не сакам сладолед.“ „Сум патувал во Италија.“
• Останатите треба да погодат кое е вистинското тврдење.

Придобивки: Поттикнување слушање, логичко размислување, хумор и подобро разбирање меѓу учениците.

Игра 3: „Кружна приказна“

Цел: Тимска соработка, креативност, составување реченици

Опис на играта:

• Учениците стојат во круг. Еден ученик започнува со клучен збор (на пример: „Другарство“) и го фрла топчето на некој друг.
• Ученикот кој ќе го фати топчето додава нов збор што го поврзува со претходниот.
• Се продолжува со додавање зборови додека не се состави смислена реченица.
• Потоа, нова рунда – составување целосни реченици на тема „Пријателство“, „Соработка“, „Разбирање“ итн.
• Составените реченици се запишуваат на хамер со маркери и се изложуваат на видно место.

Придобивки: Поттикнување креативност, тимска синхронизација и разбирање на важните вредности.

Завршна дискусија и евалуација

Учениците се собираат во круг и следува кратка рефлексија со следниве прашања:

• Како се чувствувавте додека ги игравте игрите?
• Дали ги запознавте подобро вашите соученици?
• Што научивте од овие активности?
• Како вакви игри можат да помогнат во секојдневниот училиштен живот?